(AMS) الرحلات إلى أمستردام

إقامتك في أمستردام

أمستردام مدينة مليانة أحياء مختلفة، وكل حي ليه طابع خاص بيأثر على تجربة السكن. سواء بتحب تعيش جو التاريخ في الشوارع الضيقة القديمة، أو تدور على مكان هادي بعيد عن الزحمة، أو حتى تختار إقامة اقتصادية، أمستردام عندها كل الخيارات.

مركز المدينة (Amsterdam Centrum & Canal Belt)

لو عايز تبقى قريب من القنوات المشهورة، ميدان دام (Dam Square)، والحي الأحمر (Red Light District)، يبقى المركز هو الأنسب. المنطقة دي مليانة فنادق بوتيك وشقق صغيرة، ورغم إن الأسعار فيها أعلى شوية، هتكون في قلب الأحداث وعلى بعد خطوات من أهم المعالم.

أحياء راقية وهادية زي Jordaan وMuseum Quarter

حي Jordaan مشهور بشوارعه الضيقة وكافيهاته الصغيرة، جوه دافئ وهادئ ومناسب للعائلات أو اللي عايزين استجمام. أما Museum Quarter فهو مثالي لعشاق الفن والثقافة لأنه قريب من متحف فان جوخ ومتحف ريكز، والمنطقة مليانة فنادق راقية.

مناطق اقتصادية زي De Pijp وAmsterdam Noord

لو ميزانيتك محدودة، De Pijp خيار رائع، مليان مطاعم وأسواق وأسعاره أوفر بكتير. أما Amsterdam Noord فبيوفر سكن أرخص وكمان بيتميز بجو شبابي وفني، وسهل توصله بالعبّارات المجانية اللي بتطلع من المحطة المركزية.

معلومات تهمك قبل ما تسافر أمستردام
 

الفيزا والدخول

متطلبات الفيزا لهولندا بتختلف حسب جنسيتك، عمرك، نوع الفيزا اللي مقدم عليها، ومدة الإقامة. وبما إن الشروط ممكن تتغير من وقت للتاني، الأفضل دايمًا تراجع آخر التحديثات من السفارة أو القنصلية الهولندية أو تخش موقع وزارة الخارجية الهولندية وهتلاقي هناك كل حاجة واضحة. للمزيد من التفاصيل والنصايح والإرشادات تقدر تزور صفحة الفيزا الخاصة بهولندا على موقع بيجاسوس. قبل ما تسافر، متنساش كمان تستفيد من الصفحة الإرشادية Timatic اللي هتسهل عليك حاجات كتير قبل السفر.

ميزانيتك في أمستردام

أمستردام تعتبر مدينة مش رخيصة مقارنة بمدن أوروبية تانية. وجبة في مطعم متوسط بتكلف حوالي 15–25 يورو، وكوباية قهوة من 3–4 يورو. أسعار الفنادق 3 نجوم بتبدأ من 90–120 يورو في الليلة. الدفع بالكروت البنكية مقبول في أغلب الأماكن، لكن يفضل يكون معاك شوية كاش للأسواق المحلية.

نصائح للسفر إلى أمستردام

العملة الرسمية هي اليورو (€). مكاتب الصرافة مش موجودة في كل مكان، فالأفضل تبدّل فلوسك في المطار أو البنوك. أمستردام مدينة صغيرة نسبيًا، يعني المشي أو ركوب العجل من أسهل وأجمل الطرق للتنقل. الربيع (أبريل–مايو) والخريف (سبتمبر–أكتوبر) هما أفضل أوقات الزيارة عشان الجو معتدل والزحمة أقل. الصيف مزدحم جدًا بالسياح، والشتا بارد وممطر. وسط المدينة آمن، لكن خد بالك من متعلقاتك في المناطق السياحية المزدحمة. والإنجليزي بيتكلموه بشكل واسع، يعني التواصل مش هيكون صعب. الهولنديين ناس محترمة وعملية جدًا، بيحبوا النظام والخصوصية، فحاول تحترم المساحات الشخصية وماتسألش أسئلة خاصة قوي. الكاش مش منتشر زي ما هو عندنا، معظم الأماكن بتقبل بطاقات الدفع حتى الماكينات الصغيرة.  

الطقس في أمستردام

الجو في أمستردام متقلب ومطره مفاجئ طول السنة، حتى في الصيف. عشان كده يفضل يبقى معاك شمسية أو جاكيت ضد المطر. الربيع والخريف هما أحلى وقت للزيارة بجو معتدل وأزهار مزدهرة خصوصًا حقول التوليب في الربيع. الصيف (يونيو–أغسطس) دافي نسبيًا لكن زحمة، والشتا (ديسمبر–فبراير) بارد ورطب ودرجات الحرارة بتنزل حوالي 2–6 درجات.

 أرقام مهمة تفيدك في أمستردام

●      كود الدولة (هولندا): +31

●      كود مدينة أمستردام: 20

●      رقم الطوارئ (شرطة/إسعاف/مطافي): 112

●      رقم مطار سخيبول (AMS): +31 20 794 0800

مطار سخيبول (Schiphol – AMS)

مطار سخيبول هو المطار الرئيسي في هولندا وواحد من أكبر مطارات أوروبا، بيبعد حوالي عشرين كيلومتر عن وسط أمستردام وبيخدم ملايين الركاب كل سنة. المطار متصمم بشكل حديث ومجهز بكل حاجة تسهلك السفر وتخليه مريح، عشان كده بيبقى بداية مثالية لأي رحلة جوه هولندا أو لباقي أوروبا. جوه المطار هتلاقي مطاعم وكافيهات كتير بتقدم أكل هولندي وعالمي، وكمان محلات السوق الحرة فيها عطور وهدايا وشوكولاتة وماركات معروفة. فيه كمان مكاتب صرافة وماكينات ATM لتغيير أو سحب فلوس، وجراجات كبيرة للمدد القصيرة والطويلة متوصلة مباشرة بالصالات. المطار فيه صالات VIP واستراحات لرجال الأعمال، وخدمات مخصصة لذوي الاحتياجات الخاصة عشان يسهلوا عليهم الحركة. العائلات كمان هيلاقوا أماكن لعب للأطفال وقعدات مريحة للانتظار، غير مكاتب لتأجير العربيات، وكمان فيه واي فاي مجاني في كل المطار. واللي هيخليك تتعجب ان فيه اماكن خاصة للحيوانات الأليفة ومستلزماتها.

أمستردام في انتظارك وبيجاسوس هتوصلك بسلام

مع بيجاسوس، الرحلة لهولندا أسهل بكتير مما تتخيل، بأسعار مناسبة، ترانزيت مرن في إسطنبول، وخيارات كتير للحجز. يعني الرحلة هتبدأ حلوة من قبل ما تطلع الطيارة. احجز دلوقتي!

تعمل إيه في أمستردام؟ 

تتمتع أمستردام بتراث ثقافي وتاريخي غني يمتد لقرون عديدة، حيث تضم أكثر من 7,000 مبنى تاريخي معترف به رسمياً وشبكة قنوات مائية مدرجة ضمن قائمة اليونسكو للتراث العالمي. من عصر الازدهار الذهبي الهولندي في القرن السابع عشر إلى مواقع الحرب العالمية الثانية الشهيرة، تحكي كل زاوية في هذه المدينة قصة فريدة.

إذا كان وقتك محدوداً، إليك أفضل 5 أماكن يجب زيارتها في أمستردام:

●      متحف فان جوخ (Van Gogh Museum)

●      متحف ريكز (Rijksmuseum)

●      آن فرانك هاوس (Anne Frank House)

●      ميدان دام (Dam Square)

●      القنوات المائية (Amsterdam Canals)

●      سوق الزهور العائم (Bloemenmarkt)

●      حي جوردان (Jordaan District)

أنشطة لازم تجربها في أمستردام

أمستردام مش بس متاحف ومعالم تاريخية، دي كمان مدينة مليانة أنشطة ممتعة بتديك فرصة تعيش الأجواء الهولندية على أصولها. تقدر تأجر عجلة وتتمشى بيها في شوارع وأحياء المدينة، أو تركب مركب وتعمل جولة في القنوات المائية المشهورة هناك. وكمان متفوتش الأسواق المحلية وتجرب الجبنة الهولندية، أو تقعد على كافيه ع القنال وتستمتع بفنجان قهوة أو شوكولاتة سخنة. وتقدر كمان تحضر مهرجان أو حفلة موسيقية في واحد من مسارح المدينة، غير إنك ممكن تعمل جولة في الريف القريب وتشوف طواحين الهوا وحقول التوليب خصوصا في فصل الربيع، وساعتها تبقى تجربتك في أمستردام كاملة.